Промовирани огласи »

План за управување со сомнителен случај на Ковид-19, потребно е да имаат сите хотели и туристички објекти во Грција, согласно здравствените протоколи од Министерството за туризам, додека пак хотелите со капацитет од 50 и повеќе соби, потребно е да изработат акционен план и индивидуални протоколи за секој дел од објектот за управување со евентуален позитивен случај, јави дописничката на МИА од Атина.

Секој туристички објект треба да одреди лице одговорно за спроведување на планот за справување со сомнителен случај на коронавирусот, како и лекар соработник.

Паралелно, предвидена е и обука на персоналот за начинот на пренесување на вирусот, за процесот за информирање на одговорните во хотелот како и гостите, за одржување на основните правила за лична хигиена итн.

Секој туристички објект треба да има архива со податоците за персоналот и гостите (име и презиме, националност, датум на пристигнување и заминување, телефонски број, мејл и сл) за доколку се појави сомнителен случај, да биде полесно пронаоѓањето на лицата кои биле во контакт.

Паралелно мора да се почитуваат и правилата за заштита на личните податоци.

На рецепција, треба да има антисептик за гостите, вработените да ја држат потребната дистанца, се препорачува да постојат информативни проспекти со основните здравствени упатства на неколку јазици, се препорачува пријавувањето и одјавувањето да биде по електронски пат, а плаќањето со картица.

Поставувањето заштитен плексиглас не е задолжително.

Во туристичките објекти и хотели, според протоколите од Министерството за здравство на Грција, се препорачува да се отстранат декоративните предмети, списанијата, каталозите, на далечинските управувачи за климите и телевизорите да се користи заштитна прекривка за една употреба, секојдневно да се проветруваат просториите и се препорачува во секоја соба да постои антисептик.

Веќе одредените, општи правила и прописи што важат за угостителските услуги, просторите за деца, за спа центрите и базените, за конференициските сали, продавниците и сл, истите важат и за конкретните делови доколку се во рамките на хотелите.

Хотелите кои работат во текот на целата година ќе се отворат на 1 јуни, додека пак останатите туристички објекти, две седмици подоцна, односно на 15 јуни 2020 година.

Во здравствените протоколи на Министерството за туризам на Грција, како што објави МИА, вклучени се и организираните кампови, кои исто така треба да имаат план за управување со сомнителен случај на Ковид-19.

Меѓу влезовите на камп приколките, шаторите и слично, треба да има растојание од пет метри и три метри странично.

Во однос на туристичките автобуси, треба да работат со 50 отсто од капацитетот,  на влезот треба да има антисептик, а за сите патници за целото патувањето, задолжително е носењето маска. Се препорачува често проветрување на автобусите и темелно дезинфицирање после секое патување или на крајот од смената.

Компаниите што управуваат со автобусите потребно е да имаат план за управување со сомнителен случај на Ковид-19, доколку кај некој од патниците се појават симптоми. (МИА)

Промовирани огласи »

Градинките се отвораат следната недела, а границите на средина на јуни

Секој што ќе се врати од странство оди во самоизолација.

Кон почетокот на јуни ќе почнат со работа градинките, а очекувањата се границите да се отворат кон средината на  јуни. Оние лица пак, кои со хуманитарни летови влегуваат во државата, треба да приложат ПЦР тест за коронавирусот и наместо во задолжителен државен карантин, ќе се упатат во задолжителна домашна самоизолација.

Токму средината на јуни, според министерот за здравство, Венко Филипче е најразумен период кога би требало да се отворат границите, апелирајќи дека луѓето можат да одат каде било доколку ги почитуваат мерките.

-Средина на јуни се очекува отворање на границите. Оваа недела би требало да заврши скринингот и веќе од онаа следна недела градинките ќе почнат со работа, значи отприлика на почетокот на јуни, рече Филипче.

За оние лица кои се враќаат од странство со хуманитарни летови или конвои, воведени се нови промени.

Согласно одлуката на Владата, тие пред влегување на територијата на државата треба да приложат ПЦР тест за коронавирусот КОВИД-19 направен во последните 72 часа, и наместо во задолжителен државен карантин, се упатуваат во задолжителна домашна самоизолација.

-Наместо задолжителен државен карантин, задолжителна домашна изолација се определува и за странци за кои Главниот координативен кризен штаб одлучува во случаи на постоење на државен или економски интерес, и кои ќе приложат соодветна медицинска потврда со негативен резултат од ПЦР тест, со задолжително придржување до протоколите од Комисијата за заразни болести при Министерството за здравство, соопшти во текот на вчерашниот ден Владата.

И покрај очекувањата да се релаксираат мерките, министерот за здравство, Венко Филипче вчера истакна дека постои уште еден начин на пренесување на вирусот, што во моментов кај нас е актуелен, а тоа е преку близок респираторен контакт.

-Повеќе настани, повеќе семејни настани во меѓувреме се случија од каде што излегоа нови пациенти, меѓутоа во основа е истиот механизам на таков респираторен близок контакт, за жал непочитувајќи ги мерките кои се сега во сила, рече Филипче. (МИА)

Промовирани огласи »

За платежните картички ќе биде потребно време да се изработат

Додека граѓаните ги чекаат парите за трошење од Владата

Нина Ангеловска, министерката за финансии, на денешната прес-конференција најави дека ќе биде потребно време да се изработат платежните картички за социјално ранливите структури на граѓани, нископлатените работници, студентите и средношколците и според рокот, тие треба да им бидат издадени преку банките во јуни или јули.

- Аплицирањето сакаме да биде најлесно и наједноставно за граѓаните да ја добијат картичката, но и за банките како издавачи. Да се минимизира правењето гужви. Да се насочи каде што треба, кон домашните производи. Ќе треба постерминалите да се сетираат по шифрена дејност каде таа картичка ќе може да поминува. Картичката треба и да се сетира дека од неа нема да може да се подигнува готовина. Станува збор за пософистицирано користење на платежните методи, рече денеска Ангеловска.

Како што рече таа, со нив ќе се отвори можност да се забрза електронското банкарство

- Со традиционално решение, со хартија, многу проблеми же останат нерешени, смета министерката.

Во рамки на третиот пакет мерки, граѓаните ќе треба за трошење да добијат 25 милиони евра преку платежните картички.

Промовирани огласи »

ССМ: Недела да биде неработен ден за сите работници

Синдикатите бараат недела да биде неработен ден за сите

Сојуз на синдикатите на Македонија (ССМ) смета дека здравствена криза предизвикана од КОВИД-19 покажа дека повеќе од потребно е недела да биде неработен ден за сите работници.

-Во изминиот период видовме дека со прогласените мерки и полицискиот час кој траеше за време на викендите целокупното општество може да фукционира и доколку недела е прогласен за неработен ден, соопшти ССМ.

Воедно потсетува дека покрај другите предлози за унапредување на работното законодавство во насока на заштита на работничките права и обезбедување баланс меѓу работата и семејството, ССМ веќе предложи ден на неделен одмор да бидат и сабота и недела.

-Традиционално во нашата држава и во државите на нашето опкружување се прифаќа дека саботата и неделата се денови на неделен одмор заради почитување на семејните традиции и заштита на правата што е во согласност со Конвенцијата на МОТ бр.106 за неделен одмор. Анализите и примерите  покажуваат дека работникот ќе биде попродуктивен ќе има повеќе време за семејството, за одмор и професионално надградување и дообразување, поврзано и со здравјето на работниците, а обврските можат да се завршат во текот на неделата, а истовремено да не трпи ниту бизнисот, ниту работниците и граѓаните, оценува Сојузот.

ССМ смета дека со унапредување на работничките права и со создавање правна рамка за почитување на демократските вредности ќе се изнајде правно решение со кое недела ќе биде неработен ден.

-Ваквата иницијатива на ССМ веќе се покажува и во пракса и голем број работодавачи своеволно ја прогласија недела за неработен ден. Тоа е примерот што треба да го следат и останатите работодавачи, како и Владата, наведува ССМ.

Вчитај повеќе вести...
барај огласи за вработување »