Царината во последните две години има преземено повеќе мерки за олеснување на трговијата и царинската постапка. Од 1 јуни годинава почна примената на системот за бесхартиено работење, 40 отсто од царинските постапки се вршат преку овластените економски оператори, а наскоро ќе почне и проект со Светска банка за едношалтерски систем.

Ова го посочи директорот на Царинската управа Ѓоко Танасоски на средба со стопанственици во Сојузот на стопански комори истакнувајќи дека целта е да создадат институција што е партнерски ориентирана кон деловната заедница.

Последните две години што изминаа, благодарение на посветеноста на вработените во Царинската управа , успеавме да финализираме неколку крупни проекти од различни области, кои доведоа до огромен напредок и модернизација. Резултатите што ги постигнавме се показател дека со голем ентузијазам, посветеност и доверба во сопствените капацитети се постигнуваат зацртаните цели и поставените приоритети, рече Танасоски.

Тој додаде дека со донесување на новата стратегија на Царинската управа имаат визија да бидат водечка управа во регионот што ќе даде силна поддршка на легалната економија, целосно усогласено со стандардите на Европската унија.

Да создадеме институција што е партнерски ориентирана кон деловната заедница.  Тука, пред се, мислам на поврзаност со економските оператори, царинските застапници, агенциите и службите присутни на граница, соседните царински служби. Подобрувањето на поврзаноста треба да придонесе кон значително подобрување и усовршување на работата на Царинската управа, што треба да го направиме во тесна соработка со деловната заедница, што за крајна цел треба да придонесе кон подобрување на економската конкуретност на нашата економија, рече директорот на Царината.

Посочи на податоците дека 40 проценти од царинските постапки се вршат преку седумте овластени економски оператори и оти се очекува со давање дозвола на седум нови коишто се во постапка, тој процент да се зголеми на 62.
Според потпретседателката на ССК Габриела Кулебанова, за да се обезбеди успех на реформските програми потребна е конструктивна и одржлива двонасочна комуникација и интеграција помеѓу Царината и деловната заедница.

Ова повисоко ниво на соработка ќе доведе до засилено темпо на доверба и ќе се обезбеди партнерство на долг рок, што ќе има значително влијание врз економскиот просперитет. Секако, ефикасното фукнционирање на работата на царинските служби влијае истовремено и како заштитен фактор за стопанството во земјата, штитејќи го нивното работење да не биде поткопано од нелојална конкуренција и од незаконски активности. Веруваме дека сите заложби за осовременување и дигитализација на царината  за олеснување на трговијата се во насока и на елиминирање на корупцијата, за која институциите треба да се заложат за откривање на причините на ваквата појава и за нејзино искоренување, истакна Кулебанова.

Замина од компанијата која ја градеше со години. Вложуваше и трупаше богатство од Алибаба а често споделуваше и бесплатни совети за успех со целиот свет од речиси секој настан.

Тој е меѓу најбогатите луѓе на планетата, но тоа не дозволил да му го замагли својот поглед кон иднината. Џек Ма е еден од најскромните милијардери. И тука е она на што успехот се должи неговиот успех.

Џек Ма го цени односот и ентузијазмот.

 "Една од моите најголеми грешки во почетокот беше што му реков на тимот, дека можат да стигнат само до менаџерски позиции, а директорите ќе бидат вработувани однадвор. Всушност, морав да им дадам перспектива. Важно е вработените да имаат личен однос кон компанијата", вели тој.

Ги обединува луѓето под една цел. 

Ма разбира дека луѓето претпочитаат да следат единствена цел, а не само една личност. Визијата, идејата е поважна од лидерот.

Секогаш е еден чекор пред другите. 

Ма верува дека добар директор на компанија треба да внимава на конкуренцијата, да има интуиција, да ги предвиди можните одлуки на другите.

Го дефинира неуспехот како негирање. 

Според Ма, "откажувањето е најголем неуспех". Ако го направите најдоброто што можете, но сè уште не успеавте, тоа е уште малку успех затоа што ве прави поотпорен.

Тој го сака животот. 

Секогаш велам дека не сме родени само за да работиме, туку да уживаме во животот. Но, да ги направиме работите подобро еден за друг. Ако го потрошите целото свое време, ќе жалите еден ден, вели претприемачот.

Не создавајте непријатели. 

Еден од најпознатите уникатни аспекти на деловната филозофија на Џек Ма е пријателска конкуренција. Тој смета дека неговите конкуренти не се непријатели, туку како луѓе што можат да го научат и да го предизвикаат да го покаже својот полн потенцијал.

Министерството за труд и социјална политика на Електронскиот национален регистар на прописи (ЕНЕР) го објави нацртот на законот за субвенционирање на придонесите за покачување на патите, чија цел, е поттикнување на работодавачите да исплаќаат плата во повисок износ заради подобрување на економскиот стандард на вработените и поттикнување на економскиот раст и развој на  државата.

Според нацрт законот субвенционирање на придонеси може да користи работодавач кој има статус на активен обврзник за пресметка и уплата на придонеси, односно не е во постапка на стечај или ликвидација или постапка на бришење и нема доспеани обврски по основ на бруто плата до денот на побарување на субвенцијата на придонеси, работодавач за осигуреник кој бил во задолжително социјално осигурување кај тој работодавач во сите месеци од референтниот период и за кој има зголемување на плата на начин утврден со овој закон, односно работодавач за осигуреник за кој има зголемување на плата како разлика меѓу пресметаната нето плата за месецот за кој се побарува субвенционирање на придонеси и референтната основна плата исплатена од работодавачот во референтниот период.
Субвенционирање на придонеси од задолжително социјално осигурување по основ на зголемена плата не може да остварат органите на државната и на локалната власт и други државни органи основани согласно со Уставот и со закон,  институциите кои вршат дејности од областа на образованието, науката, здравството, културата, трудот, социјалната заштита и заштитата на детето, спортот, како и во други дејности од јавен интерес утврден со закон, а организирани како агенции, фондови, јавни установи и јавни претпријатија основани од Република Северна Македонија или од општините, од градот Скопје, како и од општините во градот Скопје.
Субвенциите не може да ги користи работодавач кој за осигуреникот користи ослободување од плаќање придонеси од задолжително социјално осигурување согласно закон, за период додека го користи ослободувањето, работодавач кој за осигуреникот користи мерка за субвенција на плата преку Оперативниот план за активни програми и мерки за  вработување за периодот додека ја користи мерката и работодавач кој за осигуреникот за кој побарува субвенционирање на придонеси му е доделена финансиска поддршка за нови вработувања согласно со Закон за финансиска поддршка на инвестиции, како и приватна агенција за вработување за осигуреници кои се отстапени кај работодавачи од органите на државната и на локалната власт и други државни органи.
Согласно предложените решенија, работодавачот нема обврска да плаќа придонеси од задолжително социјално осигурување за износот за кој е одобрено субвенционирање на придонеси, највисокиот износ за кој се одобрува субвенција на придонес е зголемување на нето плата до 6.000 денари месечно по осигуреник, а најнискиот износ за кој се одобрува субвенција на придонес е зголемување на нето плата во износ од 600 денари месечно по осигуреник.
Субвенционирањето на придонесите за зголемувањето на платите согласно со одредбите на овој закон започнува да се применува со исплата на плата за октомври 2019 година.
Од Владата проценуваат дека субвенционирањето на социјалните придонеси ќе има позитивно влијание на вкупната економија, Мерките ќе придонесат за подобрување на работењето на деловните субјекти, зголемување на квалитетот во работењето, нивната продуктивност, подобрени деловни резултати во работењето, зголемување на вработеноста, зголемување на платите на вработените, на подолг рок, подобреното деловно работење ќе предизвика и поголем економски раст и развој на Република Северна Македонија.
Овој закон влегува во сила со денот на објавувањето во „Службен весник на Република Северна Македонија, а ќе се применува од 1 ноември 2019 година до 31 октомври 2022 година.
Се очекува на ваков начин да се намали исплатата на платата на работниците на рака, кое често го практикуваат работодавачите за да избегнат плаќање придонеси.

А1 Македонија поставува нови стандарди во креирањето на начинот на работење за своите вработени и со гордост објавува дека го воведува флексибилниот модел на работа именуван како “А1 Флекси”.

Со “А1 Флекси”, А1 Македонија ги урива границите на традиционалното работно време и место и се насочува кон својата цел, агилна компанија која на своите вработени им нуди флексибилен начин на работа создаден за подобар баланс на приватното време и времето поминато на работа.

Концептот нуди две категории и тоа: Flexi Тime, кој нуди флексибилност во времето на доаѓање и заминување од работа и Flexi Place, концепт кој на вработените им дозволува повремена работа од дома или од друга локација.

Флексибилното работење не е нов концепт на македонскиот пазар, но е прв пат една голема компанија како А1 Македонија да го воведе во својот начин на работење. “А1 Флекси” е голем чекор и предизвик за нашата компанија, но веруваме дека на нашите вработени ќе им овозможиме ново искуство и ќе им помогнеме да направат подобар баланс помеѓу приватното време и времето поминато на работа, вели Стефан Јовановски, раководител на одделот за човечки ресурси во А1 Македонија.

Флексибилното работно време не го менува бројот на работни часови, туку само ја зголемува продуктивноста на вработените, а со тоа и им помага да направат подобар баланс помеѓу приватното време и времето поминато на работа.

Со воведување на “А1 Флекси”, компанијата покажува дека е подготвена за организациска еволуција, преку интеграцијата на деловниот и приватниот живот, a за поголемо задоволството на вработените.