Едукативната програма за деца - “Интернетот не e само игра. Кликај безбедно...” на телекомуникациската компанија Вип продолжува и во учебната 2018/2019 година.

Вториот циклус на програмата, кој оваа година е предвидено да опфати повеќе од 20 основни училишта од различни градови на Република Македонија, започна денес во О.О.У. „Крсте Мисирков“ во Куманово за учениците од 4-то одделение при училиштето.

Ми претставува особено задоволство што денес продолжуваме со реализација на програмата ‘Интернетот не e само игра. Кликај безбедно...’ која на сите нам во Вип ни е особено драга. Оваа учебна година го надградуваме проектот и продолжуваме со уште поголем број на основни училишта на територијата на Република Македонија, а се разбира нашата долгорочна цел е проектот да прерасне во традиција и да опфатиме што е можно поголем број на ученици. Целта на проектот е да ги подготвиме децата уште од најмала возраст да знаат како подобро и паметно да ги ползуваат придобивките од Интернетот при нивното континуирано учење, надградба и забава, со особен акцент на нивната безбедност при неговото користење, изјави Мислав Галер, извршен директор на Вип. 

Партнери на проектот и оваа година се Министерството за образование и наука на Република Македонија, Бирото за развој на образованието, како и менаџментот и наставниот кадар на основните училишта каде се реализираат предавањата.

Од особена важност е образовниот процес континуирано да се надградува и надополнува со  содржини и програми кои соодветствуваат со динамиката и потребите на современото живеење, без разлика дали станува збор за формално или неформално учење. Навистина ми е драго што компанијата Вип вистински ја препознава потребата и активно придонесува кон создавање на придобивки кои ги користат најмладите генерации. Децата по природа се љубопитни и ги користат сите расположливи начини како да дојдат до саканите информации, а сите ние, и како институции, и како родители и како претставници на корпоративниот сектор, имаме обврска да им ги обезбедиме потребните ресурси кои придонесуваат за нивниот понатамошен развој, изјави Арбер Адеми, Министер за образование и наука на РМ. 

На настанот свое обраќање имаа и градоначалникот на општина Куманово г. Максим Димитриевски и Директорот на О.У. „Крсте Мисирков“ г. Александар Јовановиќ кои ја поздравија програмата и истакнаа дека соработките од ваков вид значително придонесуваат кон јакнење на капацитетите на граѓаните и децата во заедницата, но и подготовка за реалниот свет на најмладите. 

Предавањата и оваа година ќе ги реализираат вработените на Вип, кои преку интерактивни и интересни предавања прилагодени на возраста и образовната програма, ќе го прошируваат знаењето на учениците за Интернетот, фокусирајќи се на безбедноста и заштитата на личните податоци на децата. 

Во рамките на едукативната програма, до крајот на учебната година ќе бидат опфатени учениците од  четврто одделение во 12 општини: Битола, Куманово, Штип, Кочани, Струмица, Тетово, Гостивар, Охрид, Струга, Прилеп, Неготино и Гевгелија. 

Проектот “Интернетот не е само игра. Кликај Безбедно” е дел од иницијативата “Интернет за сите” на Телеком Австрија Групацијата, која во Македонија започна во 2013 година. Во рамките на проектот, минатата година предавањата ги проследија повеќе од 700 четврто-одделенци, од 28 македонски и албански паралелки од 10 училишта од 8 општини на територијата на град Скопје, а активно беа вклучени и повеќе од 70 наставници, директори, педагози и психолози од училиштата. Целта на оваа иницијатива е преку различни алатки, програми и тренинзи, учесниците да ги стекнат неопходните компетенции за нивно вклучување во општественото живеење во ерата на дигитализацијата. 

Повеќе информации за Вип и едукативната програма “Интернетот не е само игра. Кликај Безбедно” се достапни на веб страницата на Вип - www.vip.mk 

Банките нема да им наплаќаат на социјалните случаи за деблокирање на сметките поради неплатени долгови. На  средбата на банкарската асоцијација со министерот Тевдовски и министерката Дескоска, банките се согласиле да не наплаќаат надомест доколку се блокира сметка на човек кој е социјален случај, прима алиментација, хуманитарна помош или друг вид заштитен приход.

И тие се свесни дека она што банките го наплаќаат како 2.500 денари за деблокирање на сметка на примател на социјална помош, студентска стипендија, е недозволиво да го плаќа, тоа е голема сума, а за банките исклучувањето на овој надомест не е никаков финансиски проблем. Остануваме на законските одредби и имаме согласност од банките, рече министерката Дескоска.

Комората на извршители не се согласува со предлогот, тарифите да им се намалат за 60-90 %. Се жалат дека приходите драстично им се намалуваат иако бројките покажуваат дека во  нивниот бизнис се вртат милионски суми пари односно дека најпрофитабилниот извршител за 1 година имал приходи од 600 000 евра, а добивката му тежела 270 000 евра.

Во јавноста се уште е свеж случајот на пензионер кој за долг од еден денар, на извршител му плати повеќе од 200 евра. Со законот кој е во собраниска процедура и треба да се усвои до крајот на годинава, се планира кратење на сите трошоци што граѓаните ги имаат за стари долгови, па така за долг до 1000 евра трошокот за деблокирање од 20 евра ќе се намали на 2 евра, а за поголемите долгови ќе се плаќа најмногу 6 евра. Ако досега за неплатена сметка од 11 000 ден. дополнителните трошоци на граѓаните изнесуваа околу 5800 денари , со новиот закон тие ќе се сведат на 1660 денари.

Владината пензиска реформа, со која се зголемуваат придонесите за 0,5 отсто, и сите родени до 1967, а вработени по 2003 година ќе бидат префрлени во првиот столб, нема да го стабилизира ПИОМ на долг рок.

Меѓународниот монетарен фонд предлага зголемува на возрасната граница за пензионирање.Според Фондот, потребно е да се разгледаат и дополнителни мерки, како порестриктивни услови за предвремено пензионирање.

-Предложените пензиски реформи, кои вклучуваат повисоки придонеси, реиндексација на придобивки и мерки за подобрување на рамноправноста меѓу учесниците во двата столба, ќе го намалат пензискиот дефицит на среден рок.

Од друга страна, власта уверува дека овие реформи ќе му помогнат на ПИОМ да се стабилизира.

Иако проекциите за растот за следната година на Владата се 3,2 отсто, ММФ предвидува 2,8 проценти и понатамошно зголемување на 3,5 на среден рок.

ММФ очекува дека годинава буџетскиот дефицит ќе изнесува 2,6 отсто од БДП, а јавниот долг 50,5 отсто од БДП. Фондот препорачува постигнување нула примарен дефицит на среден рок за јавниот долг да почне да се намалува.

Во соопштението се вели дека враќањето на политичката стабилност и напредокот кон решавањето на проблемот со името значително ги подобриле перспективите за отварање на преговорите за членство во ЕУ.

ММФ ја потврди и стабилноста во банкарскиот сектор.

Републичкиот совет за безбедност на сообраќајот на патиштата ги потсетува мотоциклистите дека не постојат никакви изговори и оправдувања, сообраќајните правила и прописи важат и за нив исто како и за сите останати учесници во сообраќајот. 

Како посебно ранлива категорија на учесници во сообраќајот, мотоциклистите треба да бидат двојно повнимателни и двојно поодговорни учесници во сообраќајот. Почитувањето на сообраќајните правила и прописи и почитувањето на поставената сообраќајна сигнализација, од страна на мотоциклистите, е повеќе од неопходно, ако се има во предвид фактот дека при секој судир на моторно возило и мотоцикл, ризикот и веројатноста од сериозна повреда на мотоциклистот е навистина голема – велат од РСБСП.

Статистичките податоци покажуваат дека во Република Македонија мотоциклистите претставуваат само 0,5% од вкупниот број учесници во патниот сообраќај, а приближно 10% од вкупниот број загинати лица во сообраќајни незгоди. Најголем број од загинатите мотоциклисти припаѓаат на возрасната група од 25 до 34 години. Несоодветната брзина на возење и неупотребата на заштитна опрема и заштитен шлем се издвојуваат како главни причини за трагичните последици од сообраќајните незгоди.

Користењето на останатата, дополнителна заштитна опрема, како што се заштитна јакна, заштитна облека, заштитно елече и други додатоци (чизми, наочари, кожни панталони, ракавици итн.), иако се исклучително важни за безбедноста на мотоциклистите и лицата кои се превезуваат на мотоцикл, сепак нивното користење не е задолжително со ЗБСП, но е препорачливо пред сѐ заради безбедноста на мотоциклистите и на лицата кои се превезуваат на мотор.

РСБСП потсетува дека секој мотоциклист покрај останатите правила и прописи во сообраќајот, особено мора да знае дека:

• движењето во група треба да биде еден зад друг;
• возачот на мотоцикл не смее со мотоциклот со кој управува да преминува преку пешачки премини и пешачки патеки, на начин на кој ја загрозува безбедноста на пешаците во сообраќајот;
• не смее да управува со мотоциклот под дејство на алкохол и не смее да превезува лице кое е под дејство на алкохол;
• не смее да превезува дете помало од 12 години;
• не смее да пренесува предмети пошироки од еден метар;

Возачот на мотоцикл е должен да управува со возилото на начин на кој не се намалува стабилноста на возилото и не се попречуваат другите учесници во сообраќајот, а особено не смее да ги симнува рацете од управувачот, да се придржува за друго возило, да превезува, влече или да турка предмети што можат да го попречуваат во управувањето со возилото или да ги загрозуваат другите учесници во сообраќајот.

РСБСП препорачува, во овој период од годината, да се направи техничка проверка на мотоциклот, да се заменат маслото и филтерот, да се провери и наполни акумулаторот, да се провери течноста за ладење на моторот, да се исчисти или замени филтерот за воздух, да се проверат сопирачките и течноста во сопирачките (глицеринот), да се провери притисокот на воздух во гумите и особено да се провери дебелината на шарата на гумите.