До 15. септември 2018 година, Снабдување со топлина Балкан Енерџи нуди можност за бесплатно приклучување во системот за топлинска енергија, продолжувајќи ја акцијата за бесплатен приклучок од претходните грејни сезони.

Акцијата за приклучување ќе биде спроведена по принципот „прв пријавен, прв услужен“, а ќе важи за сите заинтересирани корисници кои имаат техничка можност, но не се приклучени на системот за толинска енергија. Во минатогодишната акција од сличен карактер, можноста за бесплатно приклучување ја искористија близу 3000 корисници. Со новото намалување на цената на топлинската енергија за новата грејна сезона 2018/2019 од 3,1 отсто, се очекува интересот за приклучување на системот на централно греење со топлинска енергија да се зголеми.

За да ја искористат можноста за бесплатно приклучување, заинтересираните потрошувачи треба што поскоро, а најдоцна до 15-ти септември, да поднесат писмено барање за приклучување во некој од наплатните центри на Снабдување со топлина Балкан енерџи. За да се информираат за постапката за приклучување, потрошувачите можат да се јават во Центарот за грижа за потрошувачи на БЕГ, на телефонскиот број 02/3076-200.

Релеватните показатели говорат дека користењето на топлинската енергија од системот за централно греење нуди најголем конфор за корисниците и истовремено значително е поисплатливо од другите начини на греење. Благодарение на континуираните вложувања кои значително ја зголемија ефикасноста и заштедите во системот, цената на топлинската енергија за корисниците на БЕГ, во периодот од 2013-та, од кога БЕГ ги поседува лиценците за производство, дистрибуција и снабдување со толинска енергија, до денеска, вкупно е намалена од 33% до 66%, во зависност од категоријата на потрошувачи. Заинтересираните граѓани можат и лично да се уверат во исплатливноста и предностите на овој систем преку калкулаторот за потрoшувачка на топлинска енергија, поставен на интернет страницата наСнабдување со топлина Балкан Енерџи (www.beg-snabduvanje.com.mk) кој овозможува секој потрошувач да направи индикативна пресметка и споредба на трошоците за греење на иста загревна површина при користење различни начини за греење.

Покрај индивидуалните придобивки за корисниците, со приклучување на што поголем број потрошувачи кон системот за централно греење се придонесува и за намалување на загадувањето на воздухот во градот Скопје, особено изразено за време на грејната сезона, бидејќи централниот градски систем за греење користи природен гас како гориво, задоволувајќи ги највисоките еколошки стандарди.

Поволностите од оваа акција важат само во објектите кои се приклучени на централниот систем за греење и каде има техничка можност за приклучување на потрошувачите. Секоја дополнителна интевренција во мрежата и инсталацијата во објектот на корисниците ќе се наплатува согласно ценовникот на БЕГ. По 15-ти септември, а заклучно со 30-ти септември, за повторното приклучување корисниците ќе плаќаат 50% од предвидените трошоци за оваа услуга, а од 1-ви октомври, повторното приклучување ќе се наплаќа во целост, согласно важечкиот ценовник.

Граѓаните ќе треба да ги правдаат и докажуваат и парите кои ги добиваат од роднините во странство поради новите измени со кои Управата за јавни приходи ќе добие слободен пристап до банкарските податоци. Ваквите приходи не припаѓаат на системот на оданочување.

Проблематични ќе бидат средствата од родителите према децата што работат во странство. Или некои такви средства кои не припаѓаат на системот на оданочување. Луѓето ќе треба да ги докажуваат, дека тие приходи всушност се приходи од нивни блиски роднини кои се дадени како поклон. Тоа важи исклучиво за прво колено, сето останато се даночи, вели економистот Горан Рафајловски.

Граѓаните ќе ја добиваат Годишната даночна пријава од УЈП која ќе можат во целост да ја отфрлат, прифатат или да спорат одредени приходи кои сметаат дека не треба да бидат оданочени.

Рафајловски смета дека Управата била принудена да ги направи овие законски измени.

- Проблемот се јави во оној момент кога УЈП се реши сама да ја прави даночната пријава на граѓаните. Кога си ја постави таа цел мораше да направи некаква законска измена за да ги добие сите приходи и приливи што може вас да ви стасаат на една сметка, која што понатаму ќе ве оданочат, вели Рафајловски.

Засега не е познато колку вработени во Управата ќе имаат пристап до податоците на граѓаните, но од УЈП уверуваат дека податоците се сигурни. Оттаму појаснуваат дека од банките и досега добивале податоци, но во хартиена форма.

Податоците до УЈП најверојатно ќе се доставуваат на месечна основа. Оттаму велат оти се свесни дека може да се појави проблем со приходите од странство, бидејќи потребните податоци за приходите од земјава Управата ги добива и од исплатувачите.

Македонската асоцијација на банки остро се спортиставува на овие измени, бидејќи сметаат дека со ова се навлегува во приватноста на граѓаните и заштитата на личните податоци, а со тоа се губи правниот термин „банкарска тајна".

Увид во трансакциските сметки на клиентот претставува директна повреда на неговата приватност, навики, начин на живеење, со што може да се направи непоправлива штета доколку податоците бидат доставени до трети неовластени лица или бидат објавени во јавност. Ова може негативно да влијае на довербата на граѓаните во банките, која макотрпно се гради последниве 20-тина години - велат од Македонската асоцијација на банки.

Банкарите бараат јавна расправа за да се разгледаат сите опасности кои може да ги донесе овој закон, а ако законот помине, тогаш ќе мора прецизно да се дефинира кои податоци, и во кој обем и рок ќе се разменуваат, како и начинот на чување, но и на нивно уништување.

Со измените се предвидува увид во банкарските сметки да добие и Царинската управа, но со поднесување на писмено барање до банките. На тој начин ќе се овозможи Царината да врши присилна наплата на царинските давачки.

Општините ќе можат да аплицираат за 6,5 милиони евра за капитални проекти преку Проектот за подобрување на општински услуги - МСИП. Општинските власти треба да подготват предлог-проекти со кои ќе аплицираат на јавниот повик, кој Министерството за финансии ќе го објави во септември.

Проектот за подобрување на општинските услуги го спрoведува Министерството за финансии. Тој е поддржан од Светска банка со вкупен фонд од 81,1 милион евра и ИПА грант средства за рурален развој од ЕУ во износ од 14,6 милиони евра. Целта на проектот е да ги подобри услугите кои ги дава општината на граѓаните, како и капацитетите на општинската администрација за имплементирање на проектите.

Во рамки на проектот се финансираат општински проекти како изградба и реконструкција на систем за водоснабдување, канализација и одведување отпадни води, локална патна инфраструктура, енергетска ефикасност, изградба на детски градинки, зелени пазари, инфраструктура во индустриска зона и слични проекти.

Илјадници граѓани во Македонија добиваат подобри услуги од својата општина благодарение на овој проект. Годишно, тоа се десетици километри нови или реконструирани локални улици, изградена или реконструирана водоводна мрежа, реконструирани речни корита, градинки, културни домови, општински згради итн. Ова се реални проекти, со реални вредности за граѓаните - вели министерот за финансии Драган Тевдовски.

Само преку овој проект, на годишно ниво - од јуни 2017 до јуни 2018 година, реализирани се 72 капитални проекта во 41 општина.

„Виз ер“ ја укинува продажбата на билети за двe од своите авионски линии надвор од Македонија, една недела откако владата го поништи тендерот за доделување на финансиска поддршка за лансирање на нови дестинации, објави порталот „ExYuAviation“.

Нискобуџетниот авиопревозник ја прекина продажбата на билети за Скопје-Барселона од 26 октомври. Исто така, ја прекина продажбата на билети за своите летови од Охрид до Лондон од 24 октомври.

Како што претходно беше објавено, „Виз ер“, ќе ги прекине летовите помеѓу Скопје и Ваксјо во јужна Шведска од средината на септември, поради слабата побарувачка. Последниот лет помеѓу двата града ќе биде на 16 септември, по што продажбата на билети е прекината.

Летните летови помеѓу двата града беа претставени пред една година на 14 јули. „Виз ер“ ќе продолжи да лета до Стокхолм, Малме и Гетеборг во Шведска од главниот град. Оваа година, „Виз ер“ ќе го зголеми капацитетот на своите летови од Македонија, преку надградување на двата од своите четири авиони стационирани во Скопје, од Ербас А320 до поголем А321, пишува „ExYuAviation“. Покрај тоа, компанијата ја подобри понудата меѓу Скопје и Милано, со летови до меѓународниот аеродром „Малпенса“ наместо „Бергамо“, додека новите летови од Виена до Охрид ќе бидат воведени во ноември.

Претходниот тригодишен договор со државата за субвенционирање на нови дестинации, истече во јуни. Како резултат на тоа, нискобуџетниот авиопревозник повеќе не е договорно обврзан да ги одржува своите дестинации што ги лансираше во текот на изминатите три години, ниту пак добива субвенции за нив. Македонското Министерство за транспорт и врски неодамна го поништи тендерот за нов круг субвенции. Само една авиокомпанија аплицираше, но Министерството забележа дека запечатените коверти не ги содржат името и адресата на превозникот, како што е наведено во тендерската документација.

Министерството сака да информира дека ќе објави јавен повик за доделување на финансиска поддршка за авиопревозниците во најкус можен рок, со цел да овозможи развој на воздушниот сообраќај во Македонија, се вели во соопштението на министерството.