Од 2020 година секоја аптека мора да има вработено најмалку двајца дипломирани фармацевти. Измените на законот за лекови кои пред една недела излегоа во службен весник предвидуваат правното лице кое врши промет на мало со лекови е должно да обезбеди најмалку по едно лице со завршен факултет по фармација кое ќе биде постојано присутно во смена во аптеката.

Овие измени требаше да важат од 2018, но поради недостиг на кадар одложени се за година и половина. Сегашниот закон предвидува аптеките, веледрогериите и специјализираните продавници за лекови да имаат по најмалку еден дипломиран фармацевт со положен стручен испит и техничар со средно образование. Според ваквата кадровска поставеност инспекторите на МАЛМЕД не нашле неправилности во исконтролираните аптеки.

Во 2018 извршени се се 172 надзори од кои што 38 се редовни, контролни 25 и вонредни 108 надзори и при истите не се констатирани неправилности, изјави Роберт Бекироски, директор на МАЛМЕД.

Инаку во Македонија има околу 900 аптеки и за исполнување на законската обврска од 2020 потребни се уште толку дипломирани фармацевти, но според информации на Сител и овој кадар по примерот на лекарите и медицинските сестри масовно заминува на работа во странство претежно во западно европските земји и Австралија, а на домашниот пазар речиси и да нема невработен фармацевт со лиценца.

Владата на вчерашната седница го усвои извештајот за преговорите со усогласен текст на заедничка декларација за намера на македонската Влада, застапувана од македонското Министерство за внатрешни работи и Сојузното Министерство за сообраќај и дигитална инфраструктура на Сојузна Република Германија за процедури за замена на возачките дозволи.

Ова претставува последна фаза пред потпишување на декларацијата од страна на двајцата министри, со што таа и официјално би стапила на сила. Возачките дозволи ќе им бидат признаени на полнолетни лица со важечка возачка дозвола, издадена од надлежните органи во Македонија и во Германија и кои имаат законски престој на македонска територија (најмалку 180 дена во една календарска година) или на територијата на Германија (најмалку 185 дена во годината), информираат од владината прес-служба.

Следниот неработен ден за сите граѓани е четврток втори август кога се слави Денот на Републиката, Илинден.

Ова се сите неработни денови кои преостануваат:

Програма на неработни денови за 2018 година

Согласно со Законот за празниците на Република Македонија во 2018 година неработни денови се:

За сите граѓани на РМ

• 02 август (четврток), Ден на Републиката
• 8 септември (сабота), Ден на независноста

• 11 октомври (четврток), Ден на народното востание,
• 23 октомври (вторник), Ден на Македонската Револуционерна Борба,
• 8 декември (сабота), “Св. Климент Охридски”

За граѓаните од православна вероисповед

• 28 август (вторник), Успение на Пресвета Богородица (Голема Богородица)

За граѓаните од католичка вероисповед

• 01 ноември (четврток), Празникот на сите светци
• 25 декември (вторник), првиот ден на Божик

За граѓаните од муслиманска вероисповед

• 21 август (вторник), Курбан Бајрам, првиот ден на Курбан Бајрам

За граѓаните припадници на албанската заедница во РМ

• 22 ноември (четврток), Ден на Албанската азбука

За граѓаните припадници на еврејската заедница во РМ

• 19 септември (среда), Јом Кипур, првиот ден на Јом Кипур

За граѓаните припадници на бошњачката заедница во РМ

• 28 септември (петок), Меѓународен ден на Бошњаците

За граѓаните припадници на турската заедница во РМ

• 21 декември (петок), Ден на настава на турски јазик

Банкарските картички кои овозможуваат плаќање со пинови и чипови наскоро може да станат историја, како дел од плановите да се воведе побезбеден начин на купување пишува британски Mirror.

Новите биометриски картички ќе функционираат на принцип на отисок од прст, благодарение на вградената технологија за скенирање на отпечатоци. Сè што ќе треба да напават корисниците е да отидат во банка и да остават отпечаток од показалецот, а тој ќе се регистрира на платежната картичка и така никој не ќе може да ја користи истата без дозвола на сопственикот.

Технологијата за скенирање на отпечатоци се придвижува од магнетното поле на терминалот за плаќање, па така продавниците дури и нема да мораат да ги заменат своите машини, односно за разлика од промоцијата на безконтактните картички, биометриските картички ќе работат со постојните платежни терминали.

Банките се одлучија на овој чекор поради зголемениот број на украдени или пробиени картички. Само минатата година хакерите и сајбер криминалците успеале да украдат над една милијарда евра.

Плаќањата со банкарски картички е во нагорен тренд и се очекува до 2027 година тоа да биде најкористениот начин на плаќање.

Дали со ова ќе се обезбеди целосна заштита за корисниците или пак сепак ќе има одредени пропусти кажува случајот кои го детектираа експертите за безбедност од компанијата Proofpoint кои објавија дека детектирале нов вирус – Vega Stealer, кој им се заканува на корисниците на Google Chrome и други популарни пребарувачи.

Со помош на малициозен софтвер, сајбер-криминалците крадат податоци од банкарски картички и други важни информации. Vega Stealer е модифицирана верзија на вирусот August Stealer откриен во декември 2016 година.

Се дистрибуира преку е-mail и испраќа паразити на зачуваните лозинки, документи и доверливи информации на Google Chrome, Firefox, Skype и Opera. Често вирусот доаѓа во порака од некоја голема компанија со прилог во форма на документ “short.doc”.

Вториот вклучува малициозни макроа кои го отвораат Vega Stealer. По инфицирањето на компјутерот, вирусот ја скенира работната површина на жртвата, краде важни податоци и ја испраќа до напаѓачите на далечински сервери. Експертите уште еднаш ги советуваат, корисниците да бидат внимателни кога отвараат непознати и сомнителни mail пораки.