„Улици и патишта“ на неколку улици во Скопје обележа 3Д-пешачки премини, кои, според претпријатието, создаваат оптичка илузија кај возачите дека има предмет на патот и ги принудуваат да ја намалат брзината.

Екипите на ЈП „Улици и патишта“ деновиве почнаа пилот-проект за имплементација на тридимензионални пешачки премини. На улицата „Самоилова“ кај Музејот на современа уметност веќе е изведен таков пешачки премин, а во наредниот период ќе се бележат и други локации кои се посочени како црни точки.

Тридимензионален пешачки премин се изведе на улицата Борис Сарафов во населбата Ѓорче Петрoв, пред основното училиште „Ѓорче Петров’’. Се користат четири бои, црвена, жолта, бела и сива за да бидат повоочливи за возачите и особено за децата пред училиштата, градинките и слично, велат од претпријатието.

Фото/Видео: Мкд.мк

Предлог закон со кој на граѓаните ќе им се простуваат каматите за старите долгови, најави заменик министертот за правда Оливер Ристовски во емисијата Економски магазин на Алсат М.

Како што најави заменик министерот Ристовски, Предлог законот треба да биде готов до крајот на овој месец. Предлогот е на иницијатива на пратеници и од власта и од опозицијата. Во него ќе бидат вклучени и некои од барањата на здруженијата кои со години укажуваат на недостатоците во системот на извршување.

Се работи за долгови стари и до две децении кои со новото законско решение во 2011 година прешле на извршување од судовите кај приватните извршители. Со ваквите долгови се засегнати околу 100 илјади граѓани.

Но, за Ристовски главна дилема е како ќе им се наложи на приватните компании да простуваат камати.

Да отпишете со закон камати на приватна компанија мислам дека не оди. Каде што е вода, таму е лесно. Водостопанствата се сепак локални претпријатија, таму не е проблем. Јас лично разговарав со правната служба на ЕВН и тие се подготвени да направат отпис на каматите. Нормално, тука треба да се разговара и со ЕЛЕМ бидејќи се делат паричните средства, рече заменик – министерот за правда, Оливер Ристовски.

И следната година акционерските друштва нема да плаќаат данок на капитална добивка, им порача Драган Тевдовски, министерот за финансии, на компаниите што котираат на берзата, за време на панел-интервјуто на 19.годишна конференција на Македонска берза во Охрид.

Во меѓувреме од таму потврдија дека акционерските друштва ќе продолжат со уплаќањето на задолжителната котација на берзата.

Иако на почеток на годината беше најавено од Владата дека ќе се потпише договор за заемно и реципрочно признавање на возачките дозволи меѓу Македонија и Германија, тоа сѐ уште се нема случено.

Како што пренесува Независен, од страна на Министерството за внатрешни работи потенцираа дека од страна на германските колеги биле побарани технички корекции на самиот Закон за безбедност во сообраќајот на патиштата. Премиерот Зоран Заев при неговата средба со германската канцеларка Ангела Меркел во февруари, во интервју за „Дојче веле“ изјави дека забелешките од германските власти биле од техничка, а не од суштинска природа.

Бараните измени и дополнувања на Законот за сообраќај на патиштата поминаа вчера во собраниска процедура. Следен чекор би требало да биде усогласување на терминот за потпишување на договорот за заемно и реципрочно признавање на возачките дозволи, при што од Министерството за внатрешни работи за „Независен весник“ велат дека овој процес е во завршна фаза.

Постапката за постигнување договор за реципрочно признавање на возачките дозволи меѓу Македонија и Германија е во завршна фаза. Кога ќе биде постигнат, јавноста ќе биде веднаш известена, соопштија од МВР.

Меѓутоа, граѓаните на Македонија што живеат и работат во Германија се револтирани и очекуваат експресно решение бидејќи вака губат доверба во нашите институции. Тие одамна покренаа петиција како дополнителен притисок за договор меѓу Скопје и Берлин за признавање на дозволите. На неа беа собрани над 42.000 потписи, кои само сведочат за големината на самиот проблем.

Александар Бузлески е еден од организаторите на петицијата, кој живее и работи во Германија. Тој вели дека иселениците плаќаат високи казни ако возат само со македонска дозвола. Бузлески апелира до надлежните институции што е можно побрзо да го решат овој проблем.

Македонските државјани што живеат во Германија (чиј вкупен број надминува 100.000) немаат друга опција освен да веруваат и да се надеваат во ветувањата што ги даваат македонските официјални институции. Сепак, би апелирал уште еднаш до нашите надлежни институции да направат максимални напори во насока на дефинитивно решавање на проблемот бидејќи ситуацијата кај нашинците тука во Германија е крајно напната и за нив ова е екстремно голем хендикеп, истакна Бузлески.

Според Бузлески, државјаните на Србија со десетпати помала петиција им укажаа на нивните власти за апсурдноста на овој проблем и кон крајот на февруари 2017 година издејствуваа потпишување на договорот за заемно и реципрочно признавање на возачките дозволи меѓу Србија и Германија.

Неофицијално висината на првата казна за возење со непризната дозвола во Германија изнесува 600 евра, но доколку возачот е запрен од германската полиција вторпат тогаш казнета се зголемува до 1.400 евра, а следува и таканаречен „идиот-тест“ како потврда за психичката стабилност на возачот.

Македонските државјани што живеат и работат во Германија се надеваат на брзо решавање на проблемот кој им претставува дополнителен трошок или, пак, напор за повторно полагање за возачка дозвола пред германските власти.