Виетнам сè повеќе го привлекува вниманието на ИТ професионалците од Балканот, особено на оние што работат од далечина за странски компании и бараат пониски животни трошоци. Особено интересен е крајбрежниот град Да Нанг, каде според локалните огласи може да се изнајми целосно опремен стан во модерен комплекс со базен, теретана и интернет за околу 400 до 450 долари месечно.
Покрај поевтиното домување, предност за дигиталните номади се и ниските секојдневни трошоци. Оброк во локален ресторан чини само неколку евра, а достапни се и јавниот превоз, услугите и основните намирници. Проценките покажуваат дека во Да Нанг може да се живее со месечен буџет од 800 до 1.200 евра, што за луѓе со приходи од околу 2.000 евра месечно остава простор за значително штедење.
Сепак, преселбата во Виетнам носи и одредени предизвици. Земјата нуди електронски визи до 90 дена, но сè уште нема посебна виза за дигитални номади, што значи дека за подолг престој е потребно внимателно планирање. Дополнителни фактори се временската разлика со Европа, тропската клима и приспособувањето на нова културна средина. И покрај тоа, според истражувањето „Експат инсајдер 2025“, Виетнам е рангиран како најдобра дестинација меѓу 46 земји според личните финансии, што дополнително го зацврстува неговиот имиџ како привлечна опција за живот и работа.
Тагови: дестинација ИТ сектор Виетнам