Од 15 ноември 2026 година стапува во сила обврската за задолжително поседување пропишана зимска опрема во моторните возила и мобилните машини. Според Законот за безбедност на патниот сообраќај, секој возач што нема да ги почитува правилата за користење и носење зимска опрема ќе добие платен налог со глоба од 45 евра во денарска противредност, а ќе му бидат евидентирани и 25 негативни бодови.
За возилата со најголема дозволена маса до 3.500 килограми, задолжителни се зимски гуми на сите тркала со минимална длабочина на шарата од 4 мм, или летни гуми со иста минимална длабочина ако возилото има синџири за снег соодветни на погонските тркала. За возилата со погон на сите тркала (4х4), потребни се зимски пневматици со минимална длабочина од 6 мм, односно летни гуми од 4 мм ако се обезбедени синџири за снег за задната осовина или за погонските тркала, зависно од типот на погонот.
Возилата потешки од 3.500 килограми треба да имаат зимски гуми на сите тркала со најмалку 6 мм длабочина на шарата, или летни гуми со минимум 4 мм доколку поседуваат соодветни синџири за снег. За автобусите и товарните возила што не можат да постават синџири на тркалата, задолжителни се зимски гуми на погонските тркала, како и прирачен алат. Надлежните апелираат возачите навреме да ја проверат опремата и да ги усогласат возилата со законските правила пред почетокот на зимската сезона.
Тагови: зимска опрема казна Министерство за внатрешни работи (МВР)