Да бидете забележани на работа не значи постојано да зборувате на состаноци, да се фалите со своите резултати или да бидете најгласната личност во канцеларијата. Понекогаш токму тивките, но конзистентни навики оставаат најсилен професионален впечаток.

Ако сакате вашиот труд да биде забележан, без да изгледа како да барате внимание, еве пет начини што можат да ви помогнат.

1. Преземајте иницијатива, но не преземајте сè

Еден од најдобрите начини да бидете забележани е да покажете дека не чекате секогаш некој да ви каже што треба да направите. Ако забележите проблем, размислете дали можете да предложите решение. На пример, наместо: „Ова не функционира.“ кажете: „Го забележав проблемот и мислам дека можеме да го решиме на овој начин. Ако се согласувате, можам да го подготвам.“ Тоа покажува иницијатива без непотребно наметнување. Но, важно е да не паднете во другата крајност да се обидувате да преземете секоја задача. Видливоста не треба да доаѓа по цена на преоптоварување.

2. Споделувајте ги резултатите, не само напорот

Многу луѓе мислат дека добрата работа сама по себе секогаш ќе биде забележана. За жал, тоа не е секогаш така. Не мора постојано да зборувате за себе, но корисно е повремено да го комуницирате она што сте го постигнале. На пример: „Проектот е завршен и успеавме да го испочитуваме рокот. Во следната фаза би можеле да го примениме и овој пристап...“ Наместо „Погледнете колку направив“, фокусирајте се на резултатот и придонесот. Така вашиот труд станува видлив без да звучи како самопофалба.

3. Бидете личност на која може да се смета

Понекогаш најголемата професионална видливост не доаѓа од тоа колку зборувате, туку од тоа колку сте сигурни. Ако кажете дека нешто ќе го завршите до петок – завршете го.

Ако има проблем кажете навреме. Ако некој ви постави прашање, а не го знаете одговорот – проверете и вратете се со точна информација. Со текот на времето, луѓето почнуваат да ве поврзуваат со нешто многу важно: „На оваа личност можеме да се потпреме.“ Тоа е видливост што се гради преку доверба, а не преку внимание.

4. Зборувајте кога имате нешто корисно да кажете

Не мора да зборувате на секој состанок. Но, кога имате добра идеја, корисно прашање или информација што може да помогне, кажете ја. Наместо да се обидувате да имате најмногу зборови, стремете се кон тоа вашите зборови да имаат вредност.

На пример: „Можеби треба да го разгледаме и овој ризик пред да продолжиме.“ или: „Имам една идеја која можеби ќе ни заштеди време. Може ли да ја споделам?“

Понекогаш една добро поставена реченица остава поголем впечаток од десет минути зборување.

5. Помагајте им на другите да бидат успешни

Ова можеби звучи спротивно на идејата за лична видливост, но токму тука се гради силна професионална репутација. Споделете корисна информација. Помогнете му на нов колега да се снајде. Споделете ресурс што може да му користи на тимот. Признајте го придонесот на друг колега.

Луѓето забележуваат кога некој не се обидува постојано да биде во центарот, туку придонесува тимот да функционира подобро. И што е најважно не ја присвојувајте туѓата заслуга. Ако колегата ви помогнал, кажете го тоа. Професионалната репутација не се гради само со покажување што можете вие, туку и со начинот на кој се однесувате кон другите.

Видливост не значи наметнување

Постои голема разлика помеѓу тоа да бидете видливи и да барате внимание.

Да бидете видливи значи луѓето да знаат:

• Што работите;
• Во што сте добри;
• На што можат да се потпрат на вас;
• Каков придонес давате;
• Како придонесувате кон тимот.

Не мора да бидете најгласната личност во просторијата. Понекогаш е доволно да бидете личноста која испорачува, комуницира навреме, презема иницијатива и носи вредност. На долг рок, токму таквата видливост може да биде многу поважна од моменталното привлекување внимание.

Прочитајте и за: Како споредувањето со колегите влијае врз вашата кариера

Тагови: совети за работа

Македонија, Грција и Албанија заеднички ќе работат Преспанското Езеро да биде впишано на Листата на светско наследство на УНЕСКО, во иницијатива што добива нов импулс по неодамнешното впишување на Олимп. Според грчкиот весник „Катимерини“, трите земји, со поддршка од Европската Унија, ја засилуваат соработката за заштита и меѓународна афирмација на природното и културното богатство на регионот.

Следниот петок, во грчката општина Преспа ќе се одржи средба на министрите за култура на трите земји – Лина Мендони, Бленди Гонџа и Седат Сулејмани – на која ќе присуствува и амбасадорот на ЕУ во Скопје, Михалис Рокас. Целта е да се утврдат следните чекори, а ЕУ, покрај политичката поддршка, ќе ги финансира и првите потребни студии. Рокас нагласил дека иницијативата има и пошироко геополитичко значење, бидејќи претставува пример за заеднички напор на соседни држави околу заштита на заедничко наследство.

Локалните власти и Албанија веќе ја поздравија идејата, оценувајќи дека таа може да донесе поголемо меѓународно внимание, одржлив развој, поквалитетен туризам и нови можности за локалните заедници. Иницијативата не е нова – Грција уште во 2014 година го стави езерото на индикативната листа на УНЕСКО – но сега, со заедничка кандидатура на трите земји, процесот добива нова тежина и реални шанси за успех.

Тагови: Албанија Грција Македонија Охридско Езеро Унеско Преспанското Езеро

Вчера KARIERA.mk беше дел од првиот академски час на Бизнис Академија Смилевски (БАС), со кој за новите студенти започна едно ново поглавје исполнето со знаење, предизвици и можности.

Особено ни беше драго што генералниот менаџер на KARIERA.mk, Ружица Доневска, имаше чест да им се обрати на студентите и лично да им посака лесен, успешен и исполнет прв академски час, како и многу успеси во периодот што следува.

За нас, ваквите средби се важна можност уште од самиот почеток да бидеме блиску до младите, да разговараме за нивните интереси и амбиции и да им покажеме дека професионалниот развој започнува многу пред првата работа.

Преку нашата соработка со Бизнис Академија Смилевски, продолжуваме да создаваме повеќе можности за студентите преку практични искуства, работилници, споделување знаење и активности кои ќе им помогнат полесно да го направат следниот чекор кон професионалниот свет.

На сите студенти им посакуваме успешен почеток, многу знаење, нови пријателства и храброст да ги следат своите професионални цели!

Тагови: Бизнис Академија Смилевски млади пазарот на труд прв академски час

Македонските домаќинства годишно фрлаат во просек по 86 килограми храна по жител, што е за 17 килограми повеќе од просекот во Европската Унија, покажува извештајот на УНЕП за индексот на отпад од храна за 2024 година. На ниво на државата, тоа значи вкупно 179.311 тони отпад од храна создадени во домаќинствата, додека европскиот просек изнесува 69 килограми по лице.

Над европскиот просек Македонија е и во другите сектори. Во рестораните и услугите за исхрана се создадени 51.283 тони отпад, односно околу 25 килограми по жител годишно, што е за 10 килограми повеќе од просекот во ЕУ. Во малопродажбата, пак, биле создадени 30.755 тони или 15 килограми по човек, што е за 5 килограми над европскиот просек. Според Евростат, секој граѓанин на ЕУ во 2024 година генерирал вкупно околу 129 килограми отпад од храна низ целиот синџир на снабдување.

Глобално, светот годишно фрла 1,05 милијарди тони храна, или 19% од вкупно достапната храна за потрошувачите. Во Македонија, пак, нема официјална детална статистика само за фрлената храна, туку се евидентира вкупниот органски отпад. Според Државниот завод за статистика, во 2025 година биле собрани 34.757 тони органски отпад, додека речиси целото количество собран комунален отпад, дури 99,8%, завршува на депонии.

Тагови: Европа Македонци храна