"Алкалоид АД Скопје“ донира 12.300.000 денари (200.000 евра) на наменската донаторска сметка на Министерството за здравство, отворена за справување со здравствената криза среде пандемијата на коронавирусот.

Во исто време, компанијата одлучи да ги намали цените на 158 свои производи, што ги вклучува и фармацевтските брендови „Аналгин“, „Кафетин“, „Прокулин“, „Бетадине“, „Ацерола“, „Блокмакс“ и „Бронлес“, потоа лекови за намалување на телесната температура, одредени помошни лековити средства, разни витамини и додатоци во исхраната, средствата за чистење од колекцијата „Глос“, сите дезинфициенси, антисептици, средства со антибактериско дејство и други слични производи.

„Веќе две недели Алкалоид АД Скопје функционира во извонредно турбулентни услови. Се бориме да обезбедиме залихи на производи кои не ни се примарна дејност, но во моментов се од суштинско значење за сите. Се соочуваме со огромни логистички предизвици во услови на затворени граници и блокирани и поскапени суровини и амбалажи. Почнувајќи од денеска, ќе мора да ја адаптираме и работата по смени во согласност со дозволените термини на движење, имајќи предвид дека голем дел од нашите вработени доаѓаат на работа од подрачја кои гравитираат кон Скопје“, соопшти компанијата.

Сите летови на авиокомпанијата „Виз Ер“ од скопската база ќе бидат суспендирани до 4 април. Овие мерки беа објавени на 18 март во 23 часот по локално време, следејќи ги рестрикциите на македонските власти во обидите да го спречат ширењето на коронавирусот, соопшти денеска „Виз Ер“.

Како што информираше вчера министерот за транспорт и врски Горан Сугарески, со оглед на фактот дека и двата аеродорма во државава се затворени и нема операции, договорот за финансиска подршка со „Виз Ер“ е ставен во мирување, со што нема да се исплаќаат субвенциите од државата по тој основ.

„Виз Ер“ информира и дека патниците со резервирани билети погодени од суспендираните летови кои ги направиле резервациите директно на wizzair.com или на мобилната апликација на авиокоманијата, ќе бидат автоматски известени преку електронска порака. Сто и дваесет проценти од оригиналната цена ќе бидe автоматски префрлена на Wizz сметката на корисникот, и тие ќе можат да ги искористат во текот на наредните 24 месеци за купување на сите производи и услуги на „Виз Ер“.

Патниците, исто така, можат да одберат опција за враќање на парите – за која треба подолго време да се реализира – и ќе бидат информирани за сите потребни чекори за трансфер на парите преку банка или преку картичка во посебна електронска порака. Во тој случај, патниците ќе можат да изберат 100 проценти поврат на сумата. Патниците кои направиле резервација преку туристички агенции – вклучувајќи ги и онлајн туристичките агенции – треба да ја контактираат компанијата преку која ги купиле своите билети, стои во соопштението од авиокомпанијата.

Од денеска малопродажната цена на горивата во Македонија уште повеќе ќе се намали. следејќи согласно референтните цени на нафтените деривати на светскиот пазар во споредба со изминатиот седумдневен период кои бележат радикално намалување.

Највисоките малопродажни цени на нафтените деривати и горива за транспорт, изнесуваат: - Моторен бензин Еуросупер 95 - 49,50 денари/литар, Моторен бензин - Еуросупер 98 - 52,00 денари, Дизел гориво - 45,50, Екстра-лесно масло за горење - 34,50 и Мазут - 18,738 денари.

Малопродажната цена на бензинот Еуросупер 95 се намалува за 5 денари по литар, Кај Еуросупер 98 се бележи намалување за 4,5 денари, Дизел горивото и Екстра лесното масло за домаќинство се намалуваат за 3 денари, додека мазутот се намалува за 3,195 денари.

По два циклуси на немање нови случаи ќе знаеме дека вирусот е целосно исчистен. 

Ова денеска на прес-конференција го истакна министерот за здравство Венко Филипче, изразувајќи уверување дека ситуацијата со коронавирусот во Македонија ќе има позитивно сценарио.

„Мора граѓаните да ги почитуваат сите овие мерки. Механизмот е тој, да после два циклуса на инкубација, практично сметаме дека вирусот повеќе не е никаде околу нас. Значи, тие кои биле заболени целосно оздравеле после процесот на лекување, а го нема ниту, пак, на површините и тоа е таа логика зошто се препорачува социјална дистанца, зошто инсистираме на почитување на овие одлуки, да нема движење надвор и нормално заштита на ризичните категории“, рече министерот.

За набавката на респираторни машини, рече дека постапката е прекината и дека ќе биде повторно започната.