Како држава имаме две добри пракси кои можеме да ги презентираме. Првото е носење закон за практикантство кој е во владина процедура и овозможува младите по завршено образование да се стекнат со вештини и знаења кај работодавач и понатаму да останат кај него, да бидат вработени или со тие вештини да се понудат на пазарот на труд. Втората е „Гаранцијата за млади“ која мината година се пилотораше во три општини и во нив даде вработени 1.400 млади лица. Ова ни дава основа да ја прошириме во 2019 и во 2020 очекувам да имаме и законско решение согласно европските насоки и политики.

Ова вчера го изјави министерката за труд и социјална полотика Мила Царовска по отворањето на регионалната работилница за практикантство под покровителство на Советот за регионална соработка во рамки на проектот „Платформа за вработување и социјални работи“.

Директорката на Агенцијата за вработување на Република Македонија Билјана Јовановска изјави дека за нив приоритет остануваат политиките и мерките за вработување на младите луѓе со цел да се вработат и да останат во Република Македонија.

Тим лидерот Нанд Шани изјави дека Регионалниот совет за соработка поддржува шест држави од Западен Балкан преку проектот што е финансиран од ЕУ за вработување и социјални работи.

Ги поддржуваме министерствата за труд и социјални работи и националите служби за вработување за изградба на капацитети за изработка на подобри политики на полето на вработувањето. Во Скопје заедно со МТСП и со АВРМ ги поканивме претставаниците од другите министерства за труд и агенциите за вработување од другите држави за да ги видат позитивните искуства од македонскиот закон за практиканство и гаранцијата за млади. Искуствата за практикантство овде се едни од најдобрите во регионот, овде е пилоторана и „Гаранцијата за млади“ така што сакавме другите држави од регионот да се запознаат со македонските искуства, рече Шани.

Одговарајќи на новинарско прашање директорката Јовановска рече дека во делот Гаранцијата за млади можат да ја сметаат за успешна мерка, за успешен пилот- проект.
– За практикантството во 2017 година, над 50 отсто од лицата кои беа вклучени веќе засноваа работен однос. Оваа година беше зголемен опфатот на лица вклучени во практикантство, некаде околу 1.200 лица беа со потпишани договори, а во тек е реализација на самата мерка и очекуваме во декември да излеземе со број колку од нив веќе имат склучено договори, рече Јовановска. Додаде дека од нивните искуства на терен, над 50 отсто од лицата ќе засноваат работен однос. Согласно мерката, работодавачите немаат задолжителна обврска да ги задржат лицата на работа.

Многу Македонци сѐ уште чекаат за бугарски пасош, а буагрскиот премиер, Бојко Борисов предлага затворање на Агенцијата за Бугари во странство.

Македонските граѓани се пожалија дека не можат да ги поднесат документите поради скандалот во Агенцијата и истрагата за корупција при издавањето бугарски пасоши, јави агенцијата БГНЕС.

Пред зградата на Агенцијата за Бугарите во странство денеска повторно имаше ред за поднесување документи за бугарско државјанство.

Од минатиот месец претседателот на Агенцијата за Бугарите во странство Петар Харалампиев е уапсен. Четворица добија обвиненија – претседателот, генералниот секретар на агенцијата и уште двајца други. Секретарот на агенцијата Красимир Томов во приватниот банкарски сеф чувал повеќе од половина милион лева.

На состанокот на Владата во средата, премиерот Борисов изјави дека агенцијата ќе биде затворена.

Наставниците со над дваесетгодишно искуство ќе бидат на часовите со нивните помлади колеги и ќе им укажуваат како се предава и како се учат ученици, соопшти за Деца.мк заменик-министерот Петар Атанасов. Според очекувањата, овој закон треба да се усвои во јуни, а ако тоа се случи, ќе почне да се применува од следната учебна година.

Потрошени се 20 години, милиони евра за обуки за наставници од кои нема никаков резултат. Сега идејата е обуки да се прават на самото работно место. Грешката била системска, наставниците сме ги ваделе надвор од училиште за да одат на обуки, на кои им зборувале странци, домашни експерти, па повторно сме ги враќале во истиот систем, каде што не се спроведувало наученото од обуките. Со промените е предвидено пет-шест наставници во секое училиште да работат како подучувачи со тоа што ним ќе им биде скратен бројот на часови. Откако ќе седат на час со помладите колеги, потоа ќе го анализираат часот, ќе прават рекапитулар, како е предадена лекцијата, зошто, на пример, применувал само испрашување и слично – објаснува Атанасов.

Собрението денеска го донесе Законот за отпишување камати за наплата на долгови што произлегуваат од услуги од вршители на комунални дејности, телефонија, мобилни и кабловски оператори и одржување на заеднички простории.

Законот за отпишување на камата за наплата на долгови обезбедува отпис на затезната односно казнената камата, што се однесува на главниот долг и на трошоците на постапката за комунални дејности, електрична, топлинска енергија, вода и смет, телефонија, мобилни и кабелски оператори, одржување на заеднички простории, наводнување и одводнување на земјоделско земјиште, вклучувајќи ги и трошоците на постапката од страна на должникот.

Законот предвидува отпишување на каматата што се пресметува од поднесување на тужбата за присилна наплата на паричниот долг, до конечна исплата на паричното побарување.

Станува збор за проблем со кој граѓаните се соочуваат од 2011 година, кога извршните предмети од судовите се пренесени кај нотарите, а потоа тие завршуваат кај извршителите. Во тој процес најголеми жртви се граѓаните кои се соочија со огромни затезни и казнени камати за предмети за кои не биле ни свесни дека постојат, ниту пак дека има предлози за присилна наплата.

Отпис на долговите, согласно законот, се врши врз доброволна основа од страна на доверителот.

Доверителите, кои се во приватна сопственост, доброволно одлучуваат преку своите органи на управување, за едностран опис на побарувањата по основ на наплатата на затезната, односно казнената камата на главниот долг од должниците физички лица кои стекнале право на отпис на камата согласно член 3 од овој закон.

Доверителот е должен во рок од 15 дена по приемот на доставениот доказ за извршена уплата на главниот долг, да го извести должникот по писмен пат со препорачана пратка на адресата што е регистрирана кај доверителот, за усвојување (целосно или делумно) или за одбивање на отписот на каматата. Доколку доверителот изврши отпис на каматата, должен е веднаш, но не подоцна од осум дена по донесената одлука, за истото да го извести нотарот или извршителот кај кого било трансферирано решението за извршување издадено од судот, дека е исплатен главниот долг и извршен е отпис на каматата, заради што бара запирање на постапката пред нотарот или извршителот.

Тарифата за награда и надоместок на другите трошоци за работата на извршителите и нотарите (по предмети кои произлегуват од овој закон) и од услуги утврдени со член 1 од овој закон, по претходно прибавено мислење од Комората на извршителите и нотарите, ја донесува министерот за правда во рок од 30 дена од денот на влегување во сила.

Во рамки на 65 седница пратениците дадоа поддршка и на измените на Законот на државна статистика, дополнувањата на Законот на аудио-визуелни добра, измените на Законот за академија за наставници, на Законот за наставници во основните и средните училишта, дополнувањата на Законот за пензиско и инвалидско осигурување, а во прво читање поминаа измените на Законот за нотаријат и измените и дополнувањата на Законот за извршување.

По завршување на оваа седница, пратениците требаше да продолжат со работа по 66 седница, но по барање на координаторот на пратеничката група на ВМРО-ДПМНЕ Никола Мицевски претседателот на Собранието Талат Џафери даде пауза од 30 минути.