Најавениот попис во 2020 најверојатно нема да содржи прашања за верска и етничка припадност, а тоа го најавува Апостол Симовски, директорот на Државниот завод за статистика во гостувањето во 1ТВ. Неофицијално, поради оваа причина пропадна претходниот обид за попис во 2011-та и сега оваа техничка операција на национално ниво не е извршена веќе 18 години.

Симовски смета дека во пописот не треба да влезат прашањата за етничка и верска припадност, коишто не ги пропишуваат ниту стандардите на ОН.

Пописот стана поле од голем интерес за политиката. Пописот од 2011 пропадна токму поради мешањето на политиката, а единственото за што е заинтересирана политиката е токму етничката припадност. Овој податок нема никаква употребна вредност освен политичката, вели Симовски и додава дека од тоа не зависи ниту економијата, ниту инфраструктурата, ниту образованието.

Според него, најдобар начин да се тргне политиката од пописот е да се исклучат овие две прашања и дека во суштина, прашањето не е поврзано со етничката припадност туку со јазикот. 

Симовски вели дека изминатите 18 години без попис ја оставија државата без можност да носи квалитетни политики за подобрување на условите за живот и правење грешки поради стари податоци.

Ако имате желба да инвестирате во некоја стопанска гранка, ќе ви бидат потребни информации за расположливата работна сила, за населението како потрошувачи, можности за комуникација. Веројатно и малиот број на инвестиции се должи меѓу другото и на овој факт, објаснува Симовски.

Купените лап-топ компјутери за извршувањето на операцијата, штом таа заврши, ќе бидат донирани на училиштата.

Новороденчињата на Универзитетската клиника за гинекологија и акушерство ќе добиваат бесплатно пелени и влажни марамчиња, што досега ги купуваа нивните родители.

Пелените и влажните мармчиња ќе ги донира компанијата „Бора“  која денеска ја официјализираше соработката со ГАК.

Со производите на „Бора“ ќе се грижиме за најмалите, но посебно важно е дека ќе се надмине досегашната пракса родителите сами да купуваат пелени за своите новороденчиња така што ова ќе го релаксира овој дополнителен трошок којшто го имаа родителите, истакна портпаролката на Клиниката, Драгана Букилица.

Претставникот на компанијата „Бора“, Дарко Трајковски посочи дека за нив е најважно здравјето и грижата на најмалите и оти нивните производи совршено се поклопуваат со потребите на Клиниката за гинекологија и акушерство.

Компанијата „Бора“ ќе додели донација i за здружението за еднородни семејни заедници „Една може“.

На стаклата на возилата не се поставуваат огледални фолии. Доколку стаклата на задната страна на возилата се затемнети така што пропуштаат помалку од 30% светлина, тогаш возилото треба да биде опремено со ретровизори на двете страни.

Со цел почитување на законските одредби од Законот за безбедност во сообраќајот на патиштата посебно на членот 360 од овој закон, СВР Охрид започна со реализација на акциски контроли со цел елиминирање на ваквите состојби кои можат сериозно да ја загрозат безбедноста во сообраќајот.

Со оглед дека на стаклата на возилата несмеат да се поставуваат огледални фолии, СВР Охрид преку полициската станица за безбедност во сообраќајот, ќе постави подвижни мото-патролни служби составени од полициски службеници и стручно лице од станиците за технички преглед опремен со техничкото средество тинт-метар за мерење на пропустливоста на светлина, соопшти Стефан Димоски, портпарол на СВР Охрид.

При констатирани прекршувања на одредбите од членот 360 од Законот за безбедност во сообраќајот на патиштата, ќе биде изречен прекршочен платен налог со глоба во износ од 300 евра во денарска противвредност.

Патничкото осигурување станува неизбежен дел од багажот на македонските граѓани кои патуваат во странство, особено кога одат на годишен одмор.

Се вади во осигурителните компании, преку нивните брокери и во туристичките агенции, а оттаму велат дека граѓаните при престој во странство досега најмногу го користеле за помали медицински интервенции, како што се третман на изгореници од сонце, вадење боцки од морски еж. болки во уво, иако покрива и поскапи хрируршки интервенции.

Од Агенцијата за супервизија на осигурувањето (АСО) посочуваат дека граѓаните се задоволни од тоа што го добиваат со патничкото осигурување, а доказ е податокот дека годинава до нив дошла само една поплака и тоа таква, што не се однесува на медицински третман, туку на украден багаж од незаклучено возило, за што агенцијата која го издала патничкото осигурување одбила да исплати отштета.

- Секогаш кога има незадоволни, станува збор за непознавање, информираат од АСО и посочуваат дека кога ќе дојде моментот да се искористи патничкото осигурување, задолжително треба да се прочита што пишува на него.

Различни осигуритерлни компании издаваат различно патничко осигурурвање. Со некое граѓаните не можат да одат во која било медицинска установа за да добијат медицински третман, туку треба прво да се јават на телефонскиот број назначен на полисата и да добијат инструкции каде да се упатат. Ако се упатат на лекар на своја рака, за третманот ќе мораат да си платат, а потоа осигурителната компанија нема да им ги рефундира парите.

Други компании, пак, им овозможуваат на корисниците на патничкото осигурување самите да ја изберат медицинската установа, а потоа кога ќе се вратат дома во рок од три дена со сметката треба да побараат враќање на парите. Од Агенцијата за супервизија на осигурувањето велат дека осигурителните компании во таквите случаи редовно ги рефундираат парите до сумата определена со полисата.

Најголемите забуни се случуваат со осигурувањето со франшиза, кое е поскапо, но покрива поскапи медицински интервенции за време на патувањето во странство. Но, ако франшизата на пример е на 200 евра, а лекарската услуга е поевтина, чини на пример 180 евра, тогаш нема враќање на парите. Франшизата, всушност, покрива скапа хируршка интервенција, но не и поправка на заб. Дел од корисниците на ваквото осигурување не ги знаат овие детали, па реагираат кога нема да им бидат вратени парите. Затоа, дел од туристичките агенции, како што информираат, годинава престанале да го нудат со аранжманите за летување.

Инаку, различни осигурителни компании имаат различни патнички осигурувања со различни цени. Така, некои имаат понуда и за лицата кои одат на капење за викенд во Грција. Ова осигурување е најевтино и чини помалку од 100 денари. Обично туристичките агенции кои се и дилери на патничко осигурување пакетите што ги нудат ги прилагодуваат на аранжманите што ги продаваат. Така, во повеќето за седумдневните аранжмани се издава полиса за осум осигурени денови, која чини околу 200 денари. За 10 дена осигурувањето чини 247 денари, додека има и годишно, кое покрива 30 дена по цена од 296 денари, но е само за соседните земји.

Поради забуните што настануваат ние воопшто не продаваме патничко осигурување со франшиза, туку само обично. Од осигурителната компанија со која соработуваме нудиме семејно патничко осигурување за 15 дена, што за возрасните чини 180 денари, а за децата 90 денари. Со ова осигурување се покриваат трошоци од нула до 10.000 евра, информираат од една скопска туристичка агенција.

Лицата постари од 65 години, поради поголемата подложност на здравствени ризици, за сите видови осигурувања плаќаат двојно повисока сума, а осигурителните компании постануваат возрасна граница од 70 до 72 години, над која воопшто не издаваат патничко осигурување.

Граѓаните треба да знаат и дека патничкото осигурување, какво и да е, се однесува само на акутни здравствени проблеми, односно такви кои настанале за време на престојот во земјата, а не и на хроничните. Медицинските услуги и другите незгоди што ги покрива патничкото осигурување најмногу зависат од избраниот пакетот, но по правило ги покрива трошоците за итен медицински третман, лекови, итен медицински превоз и сместување во болница, за итен стоматолошки третман, трошоци од незгода, но и за смртен случај настанат при некоја незгода, како и за траен или делумен инвалидитет кој настанал во текот на патувањето.

Накратно, со основниот осигурителен пакет е опфатено третирање на сите здравствени проблеми кои се случуваат при патување, како силни алергиски реакции од убоди на инсекти, повреди здобиени во сообраќајна незгода, инфузија за многу висока температура, екстремно повраќање, скршеници и сите други медицински интервенции кои не можат да чекаат до враќањето во Македонија. Ова бесплатно им следува и на бремените жени, но само до 28. недела од бременоста, до кога важи патничкото осигурување.

Со доплата, освен на здравствените услуги патничкото осигурување се однесува и на сигурноста на багажот и автомобилот. Но, ако се работи за украдена техничка стока, како на пример лаптоп, таблет или мобилен телефон, тогаш таа треба да е пријавена на граница, а тоа ретко се прави.