На 3 октомври, Скопје повторно ќе живее во ритамот на „Бела ноќ 2026“, со богата програма која опфаќа концерти, изложби, диџеј-настапи и содржини за најмладите.
Вечерната програма ќе се одржува од 19 до 3 часот, додека дел од детските и дневните содржини започнуваат порано.
На плоштадот „Мајка Тереза“, односно на платото пред МОБ, програмата започнува во 18 часот со детскиот фестивал „Поточиња“, по што следуваат интерактивен детски театар, настап на DJ Bono и „Допамин бенд“. Во 22 часот настапуваат Игор Џамбазов и „Гуру Харе бенд“, а по полноќ музичката програма продолжува со DJ Tammy и DJ Toshevv.
Љубителите на електронската музика ќе имаат програма и кај фонтаната „Лотус“, каде настапите започнуваат во 20:30 часот. Дополнителна музичка програма ќе има и на платото пред Музејот на современата уметност, како и на Боемска улица.
„Бела ноќ“ носи и повеќе изложби и мултимедијални содржини. Во Домот на градежниците ќе бидат претставени изложбите на Марија Рашковиќ и „Вортекс“, во Чифте амам изложбата „Пресек“ на Ирена Паскали, а во „Мала станица“ мултимедијалната изложба „Меѓу светови“ на Воскресија Андреевска.
Програмата започнува уште во текот на денот. Во Детскиот културен центар „Карпош“ од 9 часот ќе има изложба на детски ликовни творби, додека во Паркот на поезијата при Градската библиотека „Браќа Миладиновци“ ќе се одржат „Нацртај песна“ и изложбата „Види ја поезијата“.
Во Археолошкиот музеј посетителите ќе имаат бесплатен влез и можност да ја посетат содржината „35 предмети, 35 приказни“.
Дел од програмата ќе се одржува и во Младинскиот културен центар, Мостот на уметноста, Старата скопска чаршија, Музејот на град Скопје, „Аудио култура“ и на улица „Македонија“.
„Бела ноќ 2026“ ги поврзува различните градски локации во една вечер посветена на музиката, уметноста и културата.
Тагови: Бела ноќ Скопје